“Kabisa jeung kadaék, janten modal anu utama!” Kitu, ceuk Zahra mah. Tambahna, cenah, gedé kaludeung. Hartina, ulah épés méér, kudu ‘tahan banting’ ari hayang maju mah. Majar téh, kawas berlian apan moncorong herang téh lantaran diasah sina témbong kualitas nu sabenerna.
Ih, saha téa Zahra téh? Piraku teu loba nu apal. Inyana téh, Zahra Alvin Nabila Rahayu, urang Bandung. Medalna ka alam dunya di Bandung,23 Maret 2002.
Najan ngora keneh pisan, pangalamanana mah lain lalaworakeuneun. Ieu mojang Bandung nu katelahna Ara téh, keur nu leukeun niténan dunya hiburan atawa kasenian nu loba ‘diapungkeun’ dina média sosial mah, moal bireuk deui.
Néng Ara (sesebutan urang Sunda mojang pantaran Ara), pantes mun loba nu mikawanoh téh. Da, ieu mahasiswa téh aktif dina rupa-rupa kagiatan boh di kampus, boh di masarakat.
Zahra téh mahasiswa Politeknik Kesejahteraan Sosial (Poltekesos) Bandung. Najan riweuh nyuprih élmu di kampus, inyana boga karep mantuan kulawarga. Geuning, waktu boga kasempetan ngagunakeun pangabisana, inyana nyayagikeun waktu keur Freelance Model, jeung Content Creator.
Kadaek jeung Kabisa
Kadaék jeung kabisa, dina pipikiran Ara mah, lir dua sisi mata uang. Boga kadaék wungkul, ari teu boga panggabisa mah, moal jalan; kitu deui sabalikna. Ku lantaran kitu, ngarasa boga kabisa, haténa gé ngajurung ludeung malar kabisna leuwih mekar.
Tah, naon waé hasilna tina kabisa, kadaék, jeung kaludeung téh? Mémang, lain ukur lulumayanan, da geuning puguh pangabisana téh, jadi cukang lantaran inyana jadi juara dina sababaraha lomba.
Mislana:
First RU Putri Batik Indonesia 2024;- Winner Putri Batik Jawa Barat 2024; jeung- Duta Seni Kampus Poltekesos 2023.
Ngabandungan paripolah Nyi Mojang dina rupa-rupa hal, ceuk batur mah kaasup daékan. Da, mémang enya kituna téh. Néng Ara mah, aktif pisan. Di kampusna gé, lain ukur ngadon kuliah, tapi deuih aktif miluan unit kagiatan mahasiswa sanggar seni Sunda (Garnida); jeung miluan dina organisasi pemberdayaan perempuan di luar kampus.
Upma ayeuna jadi aktivis, mémang geus témbong ti bubudak. Ti leuleutik, geus témbong karesepna téh, saperti dina widang seni, ti anatara resepeun pisan lalajo filem.
Impina Neng Ara, bisa ancrub dina widang sosial pangpangna mah jadi pagawé dina widang sosial. Da, keur pribadina mah, gunana hirup téh, demi méré mangpapat, keur balaréa, lain ukur keur kapentingan pribadi. “Nu disebat berhasil téh, sanés ngan tiasa ngahontal cita-cita kanggo kapentingan urang pribadi, tapi ogé pangaruh atawa mangpaatna kanggo anu sanes,” pokna.
Edisi majalah: 3008
Leave a comment