Pikeun nu resep olahraga ngojay, Kolam Renang Tirta Lega nu perenahna di Jalan Mohammad Toha Kota No. 70 Bandung, wajib didatangan. Sabab lian ti harga asupna nu kawilang murah, Rp. 5000,- keur poé biasa jeung Rp. 6.000 dina poé peré, tempatna genaheun.
“Caina hérang. Ukuranana ogé standar. Nyaéta panjang 50 méter, lébarna 21 méter,” ceuk Rudiman, salah saurang nu mancén ngurus éta tempat ngojay légéndaris kareueus warga Kota Bandung. (Kemis, 17/04/2025).
Tara pati abreg-abregan anu daratang ka Tirta Lega mah. Iwal lamun keur poé peré sok pinuh téh. Najan kitu, ku sabab Kolam Renang Tirta Lega anu diwangun taun 1978 téh kasebutna lega, masing keur pinuh gé keur nu geus barisa ngojay mah teu jadi pasualan. Da moal matak ngaganggu. Sabab aya bagian anu déét jeung anu jerona.
Komo deui lian ti aya kolam utama anu ukuranana standar téa, aya ogé kolam renang leutik nu husus keur barudak leutik.
Nurutkeun Rudiman anu sapopoéna mancén di éta kolam saperti beberesih, nalingakeun nu keur ngarojay sangkan kajaga kasalametana, digawé di Tirta Lega kurang leuwih geus 4 taun. Ku sabab inyana ogé ahli ngojay da basa keur leutikna remen milu perlombaan, jadi aya oge nu sok hayang dilatih ku dirina.
“Kanggo sagala umur. Ti kawit murangkalih dugi ka déwasa. Malah kanggo nu nu badé ngiringan kanggo persaratan testing didamel ogé aya,” ceuk Rudiman.
Lian ti dipaké keur nu ngarojay, Kolam Renang Tirta Lega ogé sok dimangpaatkeun keur nu terapi. Utamana keur nu baroga kasakit saraf kajepit.
“Sok aya waé nu terafi mah,” ceuk Rudiman deui.
Sawatara ayeuna nu kasaksian ku Manglé, Tirta Lega caina hérang. Ngan ku sabab aya sababaraha bagian dasar kolam anu geus ‘ngerak’ siga lumut nu warnana héjo, kadang siga kotor. Hal éta cenah nu bakal dibebenah ku Pamaréntah Kota Bandung téh.
Nu jelas ngojay di Tirta Lega mah moal matak rugi. Mun bosen ngojay, di luar sabudeur kolam aya ogé taman nu réa patung-patung dinosaurs. Asupna ogé ukur Rp. 1000,- keur saurangna. ***
Leave a comment