Unggal Romadon, Masjid Al Muhyidin maneuh ngayakeun kagiatan ‘Surabi’ nyaéta Subuh Ramadhan Berbagi. Tujuanana diantarana nepikeun ceramah ka mustami anu ditutup ku acara babagi hadiah.
Pikeun Masjid Al Muhyidin anu perenahna di RT 05 RW 06 Kalurahan Pasirbiru, Kacamatan Cibiru Kota Bandung Bandung, ngayakeun kagiatan ‘Surabi’ lain hal anu susah. Sabab sapopoéna ogé éta masjid téh mundel geus biasa dipaké acara kaagamaan.
Dina ‘Surabi’, lian ti mageuhan tali silaturahmi, ngamotivasi ogé rupa-rupa kréasi nu Islami.
Nurutkeun Didi Warsidi, salah saurang nu ngokolakeun Masjid Al-Muhyidin, ayana hadiah waktu subuh keur para jamaah lain supaya daraék ibadah téh alatan ngudag hadiah, tapi sangkan istiqomah ngamamurkeun masjid. Masjid lain saukur diadegkeun fisikna wungkul tapi kudu bisa ngawangun jamaah jang ngeusianana supaya masjid mamur, “ceuk Didi
Dina sabulan Romadon geus aya rarancangna. Anu teu leupas ngabutuhkeun anggaran.
“Tapi henteu keueung, margi masarakat/jamaah nu aya di sabudeur masjid kacida ngarojongna. Malah demi nanjeurkeun ka-Islaman, ti pihak luar gé sering nu mantuan,” Didi reueus.
Saluyu jeung ngaran programna, Subuh Ramadhan Berbagi Insfirasi anu inisiatorna Faisal Renaldi, Asep Aenun Nazah, Muhammd Salman Audah, Didi Warsidi, Yayat Sobari, acarana téh babagi élmu jeung rejeki. Loba mangpaat tina kagiatan ‘Surabi’ éta diantarana masarakat bisa diajar hirup bener pangpangna ngajalankeun anu saluyu jeung ajaran Islam.
Pikeun penceramah teu hariwang, sabab di lingkungan masjid loba tokoh agama ogé kalangan akademik. Kitu deui sok dijadikeun tempat pengabdian mahasiswa UIN, UPI Cibiru nu bisa méré élmu ka para mustami sarta aya sababaraha dosén nu remen ngeusian acara dina ‘Surabi’. “Insya Alloh tina kagiatan ‘Surabi’ ageung mangpaatna kanggo balaréa,” Didi yakin. ***
Manglé 3018
Leave a comment