Ari ku rajin latihan mah bari didorong ku para guru jeung Kapala Sakolana, sarta disumangetan ku para kolotna, SD Negeri Cigerenem Juara Umum Biantara Basa Sunda sa-Kacamatan Cikadu dina acara Ajang Talenta Siswa Kacamatan Cikadu taun 2025.
Ti kénca, Tria, Naura (juara maca sajak) jeung Dhara.
Kagiatan anu dilaksanakeun di Gedung Guru Cikadu Winaya Mekar, Cianjur, 13 April 2025, Tria Nashif Kusaeri pelajar putra kelas V jeung Dhara Fajariah Rusmawan pelajar Putri kelas IV jadi pinunjul kahiji lomba biantara Basa Sunda.
Nurutkeun Hj. Teti Nurhayati, S.Pd., Kapala SDN Cigerenem nu alamat sakolana di RT 01 RW 01, Kp. Cigerenem Désa Cikadu, Kacamatan Cikadu Kabupatén Cianjur téh, dirina jeung para guru nu ngajar di éta sakola ngarasa reueus ku para muridna anu jaradi juara.
“Alhamdulillah prosés moal ngahianat kana hasil. Aya rejekina. Sim kuring sareng sadaya guru anu ngajar di SDN Cigerenem ngaraos gumbira sareng reueus,” ceuk Hj. Teti Nurhayati, S.Pd., saréngséna acara.
Naura jeung salah saurang guruna
Nurutkeun Hj. Teti Nurhayati, perjuangan lain nepi ka dinya. Sabab anu jaluara téh bakal dipilukeun dina lomba sa-Kabupaten Cianjur.
“Mudah-mudahan aya milikna deui. Anu jelas bakal digeder latihanana,” Hj. Teti Nurhayati, S.Pd., sumanget. ***
Leave a comment