Kota Bandung-Pansus 5 DPRD Kota Bandung keur ngeureuyeuh Raperda (Rancangan Peraturan Daerah) tentang Pemberdayaan dan Perlindungan perempuan. Anggota Pansus 5 DPRD Kota Bandung Nunung Nurasiah,S.Pd., nétélakeun yén Raperda nu baris dijieun téh pikeun nangtayungan wanoja sacara nyata. Déwan nyieun draft sangkan Raperda téh bisa jadi cepengan dina méré panyalindungan ka wanoja Kota Bandung.
Nurutkeun Nunung, di Kota Bandung téh masih remen kajadian wanoja nu dirogahala. Ku kanyataan éta tas waktuna pamaréntah miroséa ku cara medalkeun kawijakan. Pikeun ngarojong upaya Pamaréntah Kota Bandung téh, légialatif kudu nguatan kapercayaan masarakat. Salah sahijina nyieun aturan nu boga kapastian hukum, sangkan masarakat bisa ngarasa ditangtayungan.
Ceuk éta Anggota Pansus 5 DPRD Kota Bandung téh, kapercayaan masarakat kana aturan, mémang masih kuring. Buktina remen kénéh kajadian nu ngarugikeun wanoja, ngan teu loba laporan nu asup. Nunung miharep ku ayana aturan nu méré panyalindungan téh, bisa ngarojong tarékah ngatik kaom wanoja di Kota Bandung.
Aturan nu keur dibeuweung diutahkeun di DPRD Kota Bandung téh, dipiharep bisa ngatik para wanoja sangkan ludeung ngalaporkeun upama kaalaman hal-hal nu matak teu genah. Ku kawani éta tangtu bakal nyiptakeun rasa aman, da loba sora nu ngabéla hak-hak wanoja.
Pedaran éta Raperda téh masih ngaguluyur. Sakabéhna baris diluyukeun jeung kabutuhan, boh kabutuhan program kitu deui kabutuhan angaran. Anggaran baris ditunda di Dinas Sosial jeung Dinas Kaséhatan Kota Bandung minangka anggaran pangaping.
“Dina pedaran éta baris diajak sadayana stakeholder. Jalaran nu kedah diréngsékeun téh teu mung nu janten garapan hiji OPD,” pokna.***
Leave a comment