Kota Bandung – Masarakat nganti-nganti béwara hilal saban panungtungan bulan rewah. Béwara bisa ditepikeun satutas digelarna sidang isbat. Demi sidang isbat medar hasil ngimeutan di sababaraha titik. Tah salah sahiji sarana kampus Universitas Islam Bandung (Unisba) dipaké ngimueutan hilal.
Fakultas Syariah Universitas Islam Bandung (Unisba) ngimeutan hilal 1 Ramadan 1446 H kalayan rukun gawé jeung Kanwil Kementrian Agama Provinsi Jawa Barat Badan Hisab dan Rukyat Daerah (BHRD) Provinsi Jawa Barat. Ngimeutan hilal téh dilaksanakeun di Observatorium Albiruni Fakultas Syariah Unisba kalayan koordinat tempat Lintang -6˚54’12” LS, Bujur 107˚36’32” BT jeung luhurna tempatn 750 Mdpl (Méter di atas permukaan laut) dina poé Juma’ah (28/2/2025).
Kepala Observatorium Albiruni, Encep Abdul Rojak, S.H.I., M.Sy., nétélakeun yén éta kagiatan téh resmi kadaftar jadi titik ngimeutan hilal awal Ramadan. Hartina hasil tina ngimeutan téh baris dilaporkeun ka Kementrian Agama Republik Indonesia pikeun bahan Itsbat Awal Ramdhan 1446 H.
“Konjungsi mah dina pukul 06:03 WIB. Konjungsi téh posisi bumi, bulan, sareng srangéngé aya dina garis astronomis. Tah tina wangkid konjungsi dugi ka waktosna ngimeutan éta disebat umur bulan/hilal kinten-kinten 12 jam 10 menit,” pokna.
Encep ngémbohan yén ngimeutan hilal téh dimimitian saacan surup panonpoé pukul 18.10 WIB. Ditelek-telek salapanbelas menit, da bulan teuleumna dina pukul 18.29 WIB. Wanci sareupna, hilal dina Azimuth 263˚57’31” jeung posisi panonpoé dina azimuth 261˚56’13”.
Kepala Stasiun Geofisika Bandung, Teguh Rahayu, nétélakeun yén mekanisme ngimeutan hilal nu nangtukeun awal Hijriah ku BMKG mah ngamangpaatkeun téléskop atawa toropong komputerisasi adumanis téhnologi informasi. Sabot ngimeutan téh, ceuk Teguh, cahya hilal baris dirékam ku detéktor nu aya dina teleskop, nu sacara otomatis nuturkeun gerakan bulan di lebah kulon.
“Pikeun nu ngalarapkeun rukyat mah dina nangtoskeunana téh satutas surup srangéngé kaping 28 Fébruari 2025,” pokna.
Teguh ngémbohan yén dumasar prakiraan cuaca ti Stasion Klimatologi Jawa Barat, Kota Bandung, ijiran mah hujan ngaririncik pukul 13.00 – 19.00 WIB. Ku kituna hilal hésé kaimeut. Anapon kitu, hasil ngimeutan hilal téh baris dipasrahkeun ka Kementerian Agama pikeun tinimbangan sidang isbat netepkeun 1 Ramadan 1446 Hijriah. Sakumaha nu diundeur ti sababaraha sumber, hasil sidang isbat netepkeun awal Ramadan 2025 téh ninggang poé Saptu, 1 Maret 2025. Hal éta ditepikeun ku Menteri Agama (Menag) RI Nasaruddin Umar, dumasar sidang isbat nangtukeun hiji Ramadan 1446 Hijriyah.nu lumangsung di kantor Kemenag, MH Thamrin, Jakarta Pusat (28/2/2025).***
Leave a comment