Kota Bandung-Anggota Pansus 4 DPRD Kota Bandung Ahmad Rahmat Purnama A.Md., nétélakeun yén Dewan Perwakilan Rakyat Daerah (DPRD) Kota Bandung ngaliwatan Panitia Khusus (Pansus) 4 téh keur ngeureuyeuh Raperda ngeunaan ngokolakeun Cagar Budaya. Raperda éta téh révisi tina Raperda saacanna. Disarungsumna Raperda téh dipiharep bisa leuwih daria dina ngokolakeun wangunan cagar budaya di Kota Bandung.
Nurutkeun Ahmad Raperda cagar budaya téh kudu sagancangna diverifikasi jeung disahkeun. Sangkan aya aturan nu nangtayungan, nu mangpaatna bisa leuwih daria dina mulasara wangunan cagar budaya di Kota Bandung.
“Angot di Kota Bandung téh seueur wangunan cagar budaya mung teu acan sadayana tiasa dipulasara. Kumargi teu acan aya payung hukum nu nangtayunganana,” ceuk Ahmad tandes naker.
Sagigireun payung hukum téh, émboh Ahmad, kasadaran masarakat gé masih kurang patali jeung mulasara wangunan cagar budaya. Ahmad ngécéskeun yén ijiran mah di Kota Bandung téh aya kira-kira 1700 wangunan cagar budaya. Ngan 200 wangunan nu tas disahkeun ku Pemkot Bandung. kalolobaan mah can disahkeun, antukna masih loba nu teu kaurus.
Nilik kana hal éta, ceuk Ahmad Rahmat Purnama, wangunan nu can asup kana cagar budaya kudu sagancangna diasupkeun kana dataa sangkan bisa kaurus. Tarékah mulasara wangunan cagar budaya téh kudu terus ditalingakeun. Utama komponén nu ngurus wangunan cagar budaya salah sahijina ngurus fisik jeung infrastuktur wangunan.
“Kanggo ngurus wangunan téh, tangtos peryogi waragad. Éta kedah aya réngkolna dina aturan. Teu aya waragad nu mantes mah, atuh ngurusna gé henteu daria,” pokna.
Ceuk éta Anggota Pansus 4 DPRD Kota Bandung téh, kudu aya tanaga ahli di widang wangunan cagar budaya keur nangtukeun asup henteuna kana kategori. Hal éta ngabantu vérifikasi jeung rékoméndasi. Tanaga ahli gé nu ngungkulan polémik wangunan cagar budaya. Henteu kitu mah, dina sataun téh tarékah nangtukeun wangunan cagar budaya ngan bisa ngaverifikasi 10 wangunan, laju disahkeun jadi wangunan cagar budaya.
“Cobi wé diémut upami kitu carana. Tah aya 1700 wangunan di Kota Bandung téh. tiasa réngsé verifikasi sadayana wangunan téh peryogi sabaraha lami? Kedah seurieus lebah dieu mah,” ceuk Ahmad tandes naker.***
Leave a comment