Kota Bandung-Universitas Islam Bandung (Unisba) nguatan pamor salaku paguron luhur Unggul di Jawa Barat jeung Banten kalayan medalkeun para guru besar (profesor) sababaraha widang paélmuan. Lima guru besar anyar diistrénan di Aula Utama Unisba, Jl. Tamansari, Kota Bandung, Kemis (26/02/2025).
Lima guru besar anyar téh nyaéta Prof. Dr. Septiawan Santana Kurnia, S.Sos., M.Si., (Guru Besar Widang Ilmu Komunikasi Fakultas Ilmu Komunikasi Unisba), Prof. Dr. Pupung Purnamasari, S.E., M.Si., Ak., CA., (Guru Besar Ranting Ilmu Auditing Fakultas Ekonomi dan Bisnis Program Studi Akuntansi Unisba), Prof. Dr. Dedeh Fardiah, Dra., M.Si. Guru Besar Ranting Ilmu Media dan Komunikasi Falkultas Ilmu Komunikasi Unisba), Prof. Dr. Ima Amaliah, S.E, M.Si. (Guru Besar Ranting Ilmu Ekonomi Fakultas Ekonomi dan Bisnis Program Studi Manajemen Unisba), jeung Prof. Dr. Neneng Nurhasanah, Dra., M.Hum. (Guru Besar Ranting Ilmu Hukum Ekonomi Syariah (Fiqh Muamalah) Fakultas Syariah Program Studi Hukum Ekonomi Syariah Unisba).
Réktor Unisba, Prof. Dr. H. Edi Setiadi, S.H., M.H., dina biantarana nandeskeun yén Unisba téh mibanda cita-cita futuristis nyaéta paguron luhur unggul tempat pamedalan nonoman Islam, téhnorat, élmuwan, jeung seniman nu miboga spirit kaislaman.
“Tradisi akademik nu dilarapkeun di Unisba téh dumasar tradisi Qur’ani. Unisba tigin mékarkeun élmu nu mangpaat pikeun masarakat,” ceuk Prof Edi tandes naker.
Réktor miharep jabatan Guru Besar téh jadi cita-cita jeung harepan pikeun sakabéh dosén di Unisba. Nurutkeun Réktor, Guru Besar téh Maha Guru manukna di widang akademik. Pikeun ngahontalna butuh waktu sarta upaya maksimal. Réktor nandeskeun yén Guru Besar kudu aktif di kagiatan akademik sarta pangabdian masarakat. Guru Besar jadi bagian tina solusi nu mairan pasualan masarakat.
”Guru Besar téh kedah mekarkeun paélmuan, ngamalirkeun élmu nu medal di jurnal, buku. Janten intelektual publik nyerat di média massa, janten élmuna mangpaat pikeun kamajuan peradaban,” pokna.
Réktor nandeskeun yén tugas utama Guru Besar téh mekarkeun élmu, terus medalkeun karya. Réktor ngécéskeun yén Profésor téh tina basa Latin Profess, ludeung nepikeun, meertahankeun, méré rékomendasi isu-isu penting sacara nembrag boh dina kuliah atawa tulisan akademik.
Ka para Guru Besar nu anyar dikukuhkeun téh, Réktor Unisba nepikeun lima amanah penting. Kahiji, pengkuh jadi pamikir mandiri kalayan référénsi nu kuat tur jembar teu kabawa opini publik nu matak sasab. Kadua, ngabantu pimpinan Unisba jeung yayasan dina ngajaga moral jeung standar akademik nu alus. Katilu, ngaping dosén-dosén ngora sangkan bébér layar. Kaopat, salawasna jadi insan akademik nu nepikeun pituduh sarta panaratas, kalimana, teu mopohokeun pangorbanan, ngahaturkeun nuhun ka kulawarga.
Dina acara ngukuhkeun téh, lima guru besar nepikeun orasi ilmiahna masing-masing. Prof. Septiawan nepikeun orasi ilmiah nu judulna ‘Bagaimana Jusrnalisme Melihat Content Creator Di Dalam Kegiatan Jurnalistik’, Prof. Pupung nepikeun orasi ilmiah nu judulna ’Audit Smart & Pentahelix : Sinergi Inovatif Dalam Pencegahan Korupsi dan Pembangunan Berkelanjutan’, Prof. Dedeh nepikeun orasi ilmiah nu judulna ’Model Edukasi Literasi Digital Berdaya Dan Berbudaya Dalam Upaya Menciptkan Generasi Z Yang Cerdas Dan Kritis Menyongsong Indonesia Digital 2045’, Prof. Ima nepikeun orasi ilmiah nu judulna ’Meniti Garis Tipis : Ekonomi, Penduduk Dan Krisis Lingkungan Di Asia Tenggara’, jeung Prof. Neneng nepikeun orasi ilmiah nu judulna ’Tauhid Ekonomi Sebagai Pilar Kepatuhan Syariah Di Era Revolusi Industri 5.0’. ***
Leave a comment