Kota Bandung – Persatuan Wartawan Indonésia (PWI) Jawa Barat jeung BRI Kota Bandung, maén badminton pikeun ngaraketkeun tali silaturahmi dina pertandingan nu lumangsung pinuh ku suasana akrab.
Najan kitu, pertandingan tetep daria nu lumangsung di GOR PWI Jabar di Jalan Wartawan II No. 23 Bandung, Salasa (26/11/2024) pasosoré.
Wakil Ketua PWI Jabar Bidang Organisasi, Ahmad Syukri miharep, kagiatan éta bisa ningkakeun sinergi antara PWI Jabar jeung BRI Kota Bandung.
”Mudah-mudahan ku ayana kagiatan ieu langkung ngaakrabkeun antawis PWI Jabar sareng BRI Kota Bandung pikeun silih rojong dina rencana-rencana ka payunna,” ceuk Ahmd Syukri.
Lian ti éta ceuk Ahmad Syukri, ku olahraga bisa mopohokeun saheulaanan kana kagiatan atawa pagawéan nu geus biasa maneuh dilaksanakeun.
“Nu jelas, ku kaluarna késang bakal ngajantenkeun awak janten seger,” ceuk Ahmad Syukri deui.
Sedengkeun Humas sarta Protokoler BRI Regional Office Bandung, Dadan Setiawan, miharep kagiatan éta téh lain ukur saharitaeun.
“Salami ieu pendakna téh ukur dina Romadhon. Tapi alhamdulillah ayeuna mah dina kagiatan olahraga,” ceuk Dadan.
Kagiatan pertandingan harita dipungkas ku undian doorprize ti BRI Kota Bandung.
“Aya 15 doorprize kalawan nominal anu bénten kanggo para wartawan. Sakali deui ngahaturkeun nuhun ka PWI Jabar anu parantos ngayakeun kagiatan ieu,” ceuk Dadan deui. ***
Edisi majalah: 3005
Leave a comment