BANDUNG — Ku réana tokoh pers di Jawa Barat jadi pangdorong pikeun ngawangun Museum Pers Jawa Barat. Hal kitu diungkabkeun ku Ketua Persatuan Wartawan Indonesia (PWI) Jawa Barat, Hilman Hidayat nu boga gagasan pikeun ngadegkeun Museum Pers Jawa Barat di Jalan Asia Afrika Bandung.
“Ide awalna basa sim kuring ngobrol sareng para tokoh pers Jawa Barat. Dirojong ogé ku asét anu dipimilik sarta nyumponan sarat kanggo ngadegkeun museum,” ceuk Hilman waktu biantara dina acara seminar jeung soft lounching Museum Pers Jabar, Senén (24/2/2025).
Hilman miharep dukungan ti sakabéh pihak pikeun ngawujudkeun Museum Pers Jawa Barat. Komo deui di Jawa Barat téh loba inohong Jabar atawa inohong nasional nu milu bajuang nyorakeun jeung ngagedurkeun sumanget rayat Inonésia pikeun ngarebut tanah air tina leungeun penjajah.
”Minangka penerus sim kuring gaduh kawajiban kanggo neraskeun perjuangan nu parantos dilakukeun ku para sesepuh atanapi senior urang kapungkur. Ku diadegkeunana Museum Pers Jawa Barat ieu minangka nganuhunkeun sareng wujud panghargaan urang sadaya ka para tokoh Pers di Jawa Barat,” ceuk Hilman.
Lian ti digelar seminar ogé aya soft lounching Museum Pers Jawa Barat nu ditandaan ku nandatangan babarengan minangka diawalanana pangwangunan Museum Pers Jawa Barat.
Acara seminar éta dipiluan ku PWI Pokja kota Bandung, jajaran pangurus PWI Jawa Barat, IKWI Jawa Barat sarta Ketua PWI sa-Bandung Raya.
Narasumber nu dihadirkeun nyaéta, Noe Firman minangka pakar Pers, Agit Maulana pakar museum, Januar P. Ruswita ti SPSI sarta Dudi Sugandi fotographer senior jeung Sekretaris Disparbud Jabar Ani Widiani
Seminar jeung soft lounching éta bisa laksana ku sabab dukungan ti bank bjb, bjb syariah, Summarecon, Diskominfo Jabar sarata Djarum Foundation. ***
Manglé 3017
Leave a comment