Tong héran mun ngaliwat ka Komplék Bumi Langgeng Blok 26 No. 13 Kacamatan Cileunyi Kabupatén Bandung, teu weléh haneuteun ku kagiatan kaagamaan saperti diajar ngaji, tajwid jeung anu lianna. Hal kitu dipingpin langsung ku nu boga éta tempat nyaéta Ustad Didi Supardi sareng istrina Iis Syamsiah.
Nurutkeun Ustad Didi Supardi, dina sapoéna téh aya lima kelas atawa kolompok nu diajar di panganjrekanana sarta dingaranan Madrasah Qur’an Asyifa.
Nu ti jam 10.00 nepi ka jam 11.30 aya 15 santri kolompok PAUD jeung TK nu diajar Iqro wungkul. Bada lohor nepi ka jam 14.00 WIB aya kolompok SD kelas 1 jeung 2 nu diajar Iqro jeung Qur’an (12 santri) sarta jam 14.00 nepi ka 15.00 WIB digunakeun ku kelas 4 nepi ka kelas 6 (25 santri) nu diajar ahlak, hapalan surat pondok jeung tajwid, ngaji sarta tahfid Juz ama.
“Bada asar gé aya anu diajar 35 jalmi. Éta mah husus nu ngiringanana warga di sabudeur komplék, henteu kacampuran ku santri santri ti luareun komplék. Nu diajarkeunana perkara ahlak, hapalan surat pondok sareng tajwid, ngaji sarta tahfid Juz ama,” ceuk Ustad Didi, Kemis 20 Maret di Madrasah Qur’an Asyifa.
Kitu deui aya kolompok kalima nyaéta husus keur siswa SMP anu kabéhanana ge diajarna langsung ku Ustad Didi sareng istrina.
Lian ti ngurus Madrasah Qur’an Asyifa di panganjrekanana, Ustad Didi ogé ngajar husus ngaji di SMPN 3 Cileunyi. Kitu deui aktif di masjid kareueus warga Komplék Bumi Langgeng, Masjid At-Taqwa. Ustad Didi sok jadi guru ngaji, jadi imam sapopoé sarta méré ceramah ka mustami.
“Pokona tujuan sim kuring sareng pun bojo mah hoyong mantuan jalmi jalmi nu kirang ékonomina, tapi murangkalihna sumanget diajar kaagamaan. Numawi sagala rupina gé nu diajar di sim kuring mah henteu disuhunkeun bayaran alias diharatiskeun,” Ustad Didi nutup obrolan. ***
Manglé 3020
Leave a comment