Kota Bandung – Produksi béas di Jawa Barat dina taun 2024 téh 4,98 juta ton. Angka éta ngurangan 5,61 persén batan produksi béas taun 2023. Dumasar panalungtikan BPS, lahan panén jeung produksi paré taun 2024 téh ngurangan batan 2023. Lahan panén taun 2024 mah legana téh 1,48 juta héktar, ngurangan 6,84 persén batan 2023 nu nepi ka 1,58 juta héktar. Demi produksi paré taun 2024 téh 8,63 juta ton GKG (Gabah Kering Giling) atawa ngurangan 5,61 persén batan 2023 nu ngahontal 9,14 juta ton GKG.
Data éta ditepikeun ku Kepala Badan Pusat Statistik Provinsi Jawa Barat, Darwis Sitorus di Aula Kantor BPS Provinsi Jawa Barat (03/03/2025). Lian ti sawah, Darwis ngécéskeun yén lahan panén jagong taun 2024 legana 77,99 rébu héktar, undak 1,42 persén batan 2023 nu ngan 76,90 rébu héktar. Ngan dina produksi 2024 mah 564,29 rébu ton, ngurangan 2,23 persén batan 2023 nu nepi 577 rébu ton.
“Étangan produksi paré sareng béas téh nganggo dua métode ngempelkeun data. Métode éta téh disebat Survei Kerangka Sampel Area (KSA) sareng Survei Ubinan. Produksi hasil dikalikeun legana panén (héktar) sareng produktivitas (ton/héktar).” pokna.
BPS Provinsi Jawa Barat gé ngémbaran Nilai Tukar Petani (NTP) jeung Nilai Tukar Usaha Petani (NTUP). Dina bulan Fébruari 2015 sacara month to month NTP mah 113,53, ngurangan 0,56 persén batan Januari 2025. Ngurangan NTP mah lantaran indeks harga nu ditarima patani ngurangan 0,86 persén, sdemi indeks harga nu dibayar patani gé ngurangan 0,29 persén.
“Nurutkeun subsektor, ngirangan NTP nu pangageungna dina sasih Fébruari 2025 téh subsektor hortikultura 7,67 persén batan Januari 2025, sareng subsektor ingon-ingon 1,07 persén.”, ceuk Darwis tandes naker.
Nilai Tukar Usaha Petani (NTUP) Fébruari 2025 kacatet 115,40 atawa ngurangan 1,03 persén batan Januari 2025. Bisa ngurangan kitu téh lantaran indeks nu ditarima patani leuwih gedé batan indeks biaya produksi jeung nambahan barang modal. Indeks harga nu ditarima patani téh ngurangan 0,86 persén, demi indeks biaya produksi jeung nambahan barang modal undak 0,18 persén.
Hasil panalungtikan BPS, rata-rata harga béas di panggilingan bulan Fébruari 2025 téh 13.171 rupiah atawa sacara month to month undak 0,88 persén. Ngan sacara year on year ngurangan 9,70 persén. Dumasar jenis béasna, rata-rata harga béas premium mah 13.412 rupiah atawa naék 0,88 persén sacara month to month. Béas medium hargana 12.910 rupiah dina bulan Fébruari 2025 atawa naék 1,05 persén sacara month to month Januari 2025.
Awal 2025 Ekspor Jabar Turun, Neraca Perdagangan Masih Surplus
Dina éta kasempetan gé Kepala BPS Jabar Darwis Sitorus nepikeun kagiatan ekspor jeung impor. Dumasar data BPS. Kagiatan ekspor jeung impor Jawa Barat dina bulan Januari 2025 téh ngurangan. Ekspor Jabar dina bulan Januari 2025 téh 3,02 milyar USD, ngurangan 3,93 persén batan bulan Desember 2024. Demi dina impor mah 1,08 milyar USD. Sarua ngurangan, angkana 7,88 persén batan Désémber 2024.
“Ékspor Jabar ngirangan téh dina barang kandaraan sareng bagian-bagianana, mesin sareng pakakaks éléktrik, sarta serat stafel. Demi dina impor nu ngirangan téh dina kandaraan sareng bagian-bagianana, filamen buatan, sarta kaén rajut”, ceuk Darwis écés naker.
Wincikan kontribusi séktor ékspor panggedéna téh dina indusri nepi ka 98,58 persén, tatanén 0,82 persén, migas 0,59 persén, hasil tambang 0,01 persén.Demi dina impor nu panglobana téh bahan baku 81,92 persén, barang modal 10,44 persén, jeung konsumsi 7,64 persén.
Sacara neraca perdagangan, Jawa Barat masih suplus 1,94 milyar USD dina Januari 2025, ngan ngurangan batan Désémber 2024 nu ngahontal 1,98 milyar USD. Neraca perdagangan nurutkeun nagara dina Januari 2025 nu surplus téh jeung Amérika Serikat 452,05 juta USD, Filipina 256,60 juta USD, Thailand 194,28 juta USD jeung Jepang 138.46 juta USD. Demi nu defisit mah dagang jeung Taiwan nu -25,34 juat USD sarta Tiongkok nu -210,97 juta USD.***
Leave a comment