Kota Bandung – Bahasan Raperda Susunan Organisasi dan Tata Kerja (SOTK) cunduk ka bérés dipigawé ku Panitia Khusus (Pansus) 4 Dewan Perwakilan Rakyat Daerah (DPRD) Kota Bandung. Raperda nu medar parobahan kadua kana Perda No. 08 taun 2016 ngeunaan pembentukan dan susuan perangkat daerah, nu kudu disarungsum.
Anggota Pansus 4 DPRD Kota Bandung H. Soni Daniswara, SE nétélakeun yén parobahan téh nyoko kana ayana parobahan di Pemerinah Pusat. Hal-hal nu tas dibahas ku Pansus 4 DPRD Kota Bandung nyaéta Raperda SOTK, patalina jeung rarancang pamedalan BPBD (Badan Penanggulangan Bencana Daerah,red) téh kudu dirobah deui. Demi sababaraha hal nu dirobah téh, salah sahijina éfésiénsi anggaran nu dilaksanakeun ku Pemeritah Pusat. Ku kituna SDM (Sumber Daya Manusa) nu baris nyicingan jabatan gé kudu dibebenah deui.
Nurutkeun Soni, DPRD Kota Bandung saacanna tas nyatujuan tén patali jeung jabatan nu aya di BPBD mah bisa ngarangkep. Ngan kudu disaluyukeun da kabutuhan SDM di Pemkot Bandung téh teu nyumponan 100 persén.
“Misalna tina kabutuhan SDM di salah sahiji SOTK téh aya 50 jalmi, nanging kaeusian ku 35 urang. Janten di BPBD gé kitu, SDM saayana heula, nu penting aktif. Teu kedah ngantosan deui,” ceuk Soni tandes naker.
Soni ngémbohan yén nu dipaliré téh najan SDM di SOTK Pemkot Bandung teu nyumponan 100 persén, tapi balanja pagawé mah ngaleuwihan tina jumlah nu tas ditangtukeun ku Pemerintah Pusat.
“Ti pemerintah pusat mah, balanja padamel téh maksimal 30% tina APBD saban wilayah, demi di Kota Bandung mah kinten-kinten 40%. Janten patarosan nu 10% dianggo kanggo naon,” pokna.
Nurutkeun Soni, Badan kepegawaian dan Pengembangan Sumber Daya Manusia (BKPSDM) Kota Bandung tas ngabéjérbéaskeun ngeuaan hal éta. Tarékah tas dilarapkeun pikeun tinemu solusi. “Kedah aya data akurat perkawis hal éta ti BKPSDM. Naha jalaran SOTK nu lintuh, atanapi kumargi seueur nu pangsiun,” pungkasna.***
Leave a comment