Saluyu jeung kamekaran jaman, nu usaha ku cara ‘online’ beuki ramé. Pangpangna dilakukeun ku nu ngarora. Salah sahijina Doni Pebrianto, nu ti awal 2024 ngajualan rupa-rupa sapatu urut nu husus mérek kasohor. Kumaha lalakonna? ***
Balanja atawa usaha ku cara ‘online’ kiwari geus mangrupa gaya hirup. Lian ti hargana bisa leuwih murah, konsumén jeung anu jualanana henteu kudu adu hareupan. Hahargaanana gé leuwih murah batan langsung meuli ka toko.
Teu anéh kiwari mah mun nu nganteurkeun barang ka imah-imah atawa ka kantor, ampir unggal poé aya. Di kota atawa di lembur sarua waé. Ti mimiti barang saperti pakéan, sapatu, éléktronik, alat olah raga, dahareun, inumeun, malah meuli tarajé ge bisa dipesen ngaliwatan ‘online’.
Keur jalma-jalma nu kréatif, kasempetan sarupa kitu digunakeun sahadé-hadéna pikeun usaha. Hand Phone atawa HP bener-bener dipikabutuh. Sabab tina HP éta sagala rupana bisa dilakukeun. Ti mimiti mesen barang, ngajual, transaksi, kaasup maca pasar naon anu sakirana dipikabutuh ku masarakat.
Salah sahijina Doni Pebrianto, warga Jalan Mohammad Hata, Gang Citalaksana, RT 01 RW 01 nomer 35 Cipedes Kota Tasikmalaya. Doni anu wedalan Universitas Muhamaddiyah Yogyakarta jurusan hukum sarta dua kali tésting jadi polisi henteu katarima téh, mimiti Januari 2024 robah haluan usaha jualan ‘online’ nu ngahususkeun sapatu budak.
“Kawitana mah sapatu atanapi sendal kanggo murangkalih. Margi di Tasik mah teu aya anu muka usaha kana sapatu ‘second’ murangkalih,” ceuk Doni di tempat usahana anu sakaligus panganjrekanana sababaraha waktu ka tukang.
Kadieunakeun ku sabab usahana beuki maju, nu disadiakeun ku Doni ditambahan ogé ku sapatu-sapatu keur déwasa. Ngan kabéh ogé mérek sapatu anu geus kasohor anu karéréaanana mah produk luar negri.
Nurutkeun Doni, najan jualan ‘online’ kacida viralna, tapi masih aya anu masih cangcaya lamun meuli ku cara ‘online’. Hal kitu teu bisa dipungkir, ceuk Doni kumaha jalmana. Da sok aya waé anu teu jujur. Contona barang anu datang téh teu saluyu jeung nu dipesen. Boh warna, wangunna, atawa ajénna (kualitas).
“Pokona sim kuring mah prinsipna ‘Trusted and Branded’. Terpercaya sareng Bermérek. Éta téh kedah dipertahankeun. Nami usaha sim kuring mah Second Kid, nu gaduh slogan Trusted & Branded,” ceuk Doni.
Kudu Jujur
Ku lantaran barang-barangna kaasup mahal, anu dijual ku Doni kabéhanana gé barang ‘second’ import. Harga pameulianana rupa-rupa. Ti mimiti nu welasan juta nepi ka nu puluhan juta dina sa’Bal’ téh. Gumantung ajénna.
Nu ngaranna meuli ‘bal’-an, henteu salilana saluyu jeung nu dipiharep. Kadang aya barang anu nu kurang alus nepi ka nyésa hésé kajual. Tapi deuih henteu saeutik nu nguntungkeun. Upamana aya sapatu anu dijual nepi ka Rp. 500.000,- sapasangna.
“Tapi tara dugi ka rugi mah. Paling untungna aya anu ageung sareng anu alit,” ceuk Doni deui.
Minangka promosi sok dina Facebook atawa Tik-tok jeung anu lianna. Tapi Doni leuwih neueulkeun dina Instagram. Sabab nurutkeun Doni nu baroga Instagram mah bisa dipastikeun ti golongan jelema pertengahan ka luhur.
Kréativitas Doni teu cukup ku kitu, kadang dina poé-poé peré mah Doni gé muka lapak di sabudeur Lapang Dadaha kareueus warga Kota Tasikmalaya.
“Nya lumayan, sakantenan promosi ogé. Kadang nu mésér téh sok sakantenan nyuhunkeun alamat,” Doni nerangkeun.
Aya sababaraha kaunggulan cenah dagang ku cara ‘online’ mah. Diantarana sagala rupana cukup ku tina HP. Anu kadang keur gogoléran gé sok aya nu mesen barang. Kitu deui teu kudu boga karyawan keur saayeunaeun mah.
“Nu paling utama kedah jujur ngajaga kapercayaan ka konsumén sareng kedah apal kana kabutuh masarakat. Konsumén dipahing pisan sangkan ulah kuciwa. Kitu deui harga kedah ramah sarta tetep sumanget. Nu ulah hilap ngado’a ka Nu Maha Kawasa. Éta koncina mah,” Doni Pebrianto mungkas obrolan. ***
Leave a comment