Voice of Bacéprot remen manggung ka luar negeri. Lian ti pangalaman midang di nagara deungeun, pikeun Euis Siti Aisyah mah aya luang keur ngasaan rupa-rupa kulinér.
“Ngawitan mah asa anéh kana létah téh. Mung saatos diraosan deui mah nya janten raos,” ceuk éta drumer VoB dina katerangan via WhatsApp ka Manglé (23/11/2024).
Siti kungsi mikalandep chicken salad. Ka mamana menu éta nu dipesen. Dina ngala pangalaman kulinér gé, Siti kungsi nyeri beuteung nepi ka 5 kali bolak-balik jamban. Lantaran nuang nasi kandar di Malaysia. Can biasa ku bungbuna.
“Bingah tiasa tour luar negeri. Tiasa ngaraosan katuanganana. Mugia baé ka payunna mah langkung remen, aamiin,” pokna.
Resep ngasaan kuliner luar negeri, Siti teu poho kana kadaharan tradisional. Nu dipikaresepna jajanan pasar saperti klepon, lemper, nagasari, lapis jsb. Ngan jajanan éta mah tara dibabawa tour da inggis haseum. Nu biasa dibekel téh emih, kiripik, jeung sambel bungkus.***
Mangle No. 3005
Leave a comment