DPRD Kota Bandung ngadorong sangkan cagar budaya jadi salah satu déstinasi Pariwisata di Kota Bandung. Aturan ngeunaan hal éta dibahas ku Pansus 4 DPRD Kota Bandung mangrupa Rancangan Peraturan Daerah (Raperda) ngeunaan Pengelolaan Cagar Budaya.
Anggota Pansus 4 DPRD Kota Bandung Susanto Triyogo Adiputro S.ST. M.T., nétélakeun yén nu dipedar téh dua raperda, nyéta Raperda ngeunaan Perubahan Kedua Atas Peraturan Daerah (Perda) Nomer 8 Taun 2016 tentang Pembentukan dan Susunan Perangkat Daerah serta Raperda tentang Pengelolaan Cagar Budaya. Susanto nandeskeun yén dina raraga ngadorong sangkan cagar budaya jadi déstinasi wisata téh kudu dirojong ku infrastruktur. Lian ti éta kudu aya kawijakan sistim ngokolakeun nu ngahiji antara SKPD (Satuan Kerja Perangkat Daerah) jeung stakeholder lianna.
“Ieu téh masih prosés (bahasan Perda). Mugia baé prosés ieu dina raraga majukeun Kota Bandung ku rupaning sajarah, budaya, sareng kasang tukang lianna nu ahéng. Janten titinggal sajarah téh tiasa dipiara tur dipulasara,” ceuk Susanto tandes naker.
Dina gurat badagna mah, émboh Susanto, aya 5 hal nu dibahas dina Perda, nyaéta nu patalina jeung nyalametkeun, ngamankeun, sistim zonasi, miara, jeung mulasara. Lima hal éta raket patalina jeung ngamumulé jeung panyalindungan cagar budaya.

Nurutkeun Anggota Pansus 4 DPRD Kota Badung, dina sistim zonasi gé dibagi-bagi, aya nu disebut zonasi inti, zonasi pananggeuy, jeung zonasi mekarkeun.Sistem zonasi ieu, baris jadi dasar masrahkeun inséntif jeung kompensasi keur nu boga cagar budaya. Dina Perda téh baris kaunggel bab husus patali jeung insentif sarta komopensasi.
“Inséntif nu dipasihkeun téh misalna fasilitas pajeg, dikirangan PBB (Pajak Bumi dan Bangunan), pajeg pangasilan. Teras inséntif advokasi, sarta bantosan anu kalebetna non matéri spertos layang pangajén,” pokna. Susanto ngécéskeun yén Pansus 4 gé keur neuleuman unggal bab, pasal per pasal. Sakurang-kurangna aya 170 pasal. Dina danget ayeuna Pansus 4 keur inventarisasi pasualan patali jeung cagar budaya.Dipiharep Perda éta bisa ngawadahan sakabéh stakeholder. Perda éta ngarojong Kota Bandung salaku kota jasa, dagang, jeung wisata.***
Leave a comment